حوار مع ...

على الرغم من وجود اشخاص نتعامل معهم بأستمرار - كمربيين وهواه اسماك - الا اننا لا نعرف عنهم الكثير ..

منه من اصبح صديقنا ومنهم من اصبح رشدنا وثكلنا الاعلا في عالم التربيه والاعتناء بالاسماك ...
اليوم اسمحوا لي ان ابدأ معكم وبكم باب للحوار ... حوار سيكون طرفه الاول هاوي والطرف الاخر هاوي متقدم هاوي قد خرج من عالم الهوايه الي عالم الاحتراف ولكن مازال قلبه ينبض بحب تلك الهوايه ...هاوي حتى ولو اتجه للتاجره او كان تاجرا فهو لم يتنازل عن احترام الهوايه ...
دعوني ابدأ معكم المشوار .....
اليوم حوارنا مع احد اهم المستورديين في مصر واحد اهم علامات الهوايه في مصر
هو اسم كان قويا واصبح اقوى في عالم الهواه
اليوم سنتحاور مع المهندس ناجي عزيز انطوان


86: اول كل شئ عايزين نعرف حضرتك الاول شخصيا
م.ناجي : الاسم : ناجي نطوان عزيز
السن : 45 سنه
المؤهل الدراسي :بكاليريوس فنون جميله


86: ايه حكايت حضرتك مع السمك ؟
م.ناجي:اتولدت وانا شايف البيت مليان احواض لان والدي كان هاوي جدا الاسماك كمان لان السمك صامت !!

86: طيب نتكلم شويه عن المحل هنا ... امتى بدأتوا ؟
م.ناجي: دا مش المحل الاصلي المحل الاصلي الي جنب الزعبلاوي و والدي فتحه سنه 1973 وفي سنه 1990 فتحنا المحل دا
علشان هنا اكبر ...
بس المحل التاني الي بجانب الزعبلاوي مش تبعنا حاليا لان بعد ما فضينا الشركه اخوي خذ المحل التاني
وهو حاليا مأجره لواحد تاني بس هو واخد الوجو

86 : نفس فكره الفرنشيز يعني ؟؟ طب ليه متعملش فروع تانيا خصوصا خارج القاهره ؟
م.ناجي: السمك عايز عنايه شخصيه وعايز متابعه دقيقه - تعليق " بمعنى انه مش حيثق في حد تاني انه يحافظ على الاسماك والاسم بالطبع" –

86: مين اكتر فئه بيجي تشتري شباب ولا كبار ؟ ومين اكتر استمراريه في التواجد؟
م.ناجي: لأ كله تقريبا دا حتى سعات كان زباين من ايام الوالد ولدهم بيجوا لأ مش بس جيل معين كله بيجي

86:ليه اتوجهتوا للسوق الالمانيه و تحديدا لشركه سييرا ؟
م.ناجي: لان اوربا الافضل بالعنايه بالاسماك والالمان هم الافضل فيها

86: طب ليه مثلا مرحتوش على اليابان مثلا ؟
م.ناجي: لأ برضوا المان الفضل في التقنيات و الادويه بس احنا بنجيب السمك من مزارع في سنغافوره و بلاد شرق اسيا عموما لكن الادويه والمستزمات من المانيا لانهم الافضل

86: بالمناسبه ايه اول سمكه حصرتك او اول مجموعه كانت عند حضرتك ؟
م.ناجي: جوبي-زيبرا- انجل- مولي مكانش فيه غير البلاك مولي......." تفكير عميق" والفايتر كمان

86: الاسماك الي حضرتك بتحب تقتنيها شخصيا – حاليا-
م.ناجي:الديسكس – يخ- والانجل والتترا بانواعها

86: حضرتك شايف هل فكره وجود الاحواض انتشرت مؤخرا في مصر ؟
م.ناجي: ايوه انتشرت وبقى في اي فندق او عياده او اي مكان حتلاقي فيه حوض

86:حضرتك شايف ايه اكتر انواع الاحواض المنتشره مياه عذبه ولا المالحه اكتر ؟
م.ناجي: المياه العذبه هو الاكتر انتشارا لانه اسهل وتكلفيتها اقل و انتشارها عند التجار اكتر وكمان عمر اسماك المياه العذبه بيكون اكبر فبتكون عشره -بكسر العين -مع المربي

86:ايه اكتر العيوب الي حضرتك بتشوفها عند اهواه ؟
م.ناجي: تغيير المياه

86: فعلا تغيير المياه ارخم حاجه في الهوايه كلها .....طيب هو فيه مواسم اكتر بينشط فيها الاهتمام بالسمك ؟
م.ناجي:الشتاء لان الصيف الناس بتكون في المصايف و رمضان

86: رمضان !!!!! ليه ؟
م.ناجي: بيكون الناس اكتر في البيوت

86: الصيف بيكون صعب اوي انا بسميه مجزره الاسماك التانيه بعد الفلانتين
م.ناجي: فعلا الصيف بيكون صعب خصوصا شهر 7 و 8

86:ايه اكتر سمك مش واخد حقه من الهواه في مصر ؟
م.ناجي:كل السمك الصغير مش واخد حقه خالص في مصر علشان احنا بنحب السمك الكبير والبلاك ويدو برضوا مش وخدا حقها نهائي مع انها سكه جامده وبتستحمل –ملحوظه واضح ان م.ناجي بيحب البلاك ويديو جدا وانا بتفق جدا معاه في النقطتيتين دول بالذات -

86 : انا برضوا بحب البلاك ويدو جدا وكانت من اول سمكاتي خالص ..
طيب ايه اكتر سمكه مكنتش تتوقع انها تلاقي الرواج دا عند المربيين
م.ناجي: -وبدون تفكير – الجولدن فيش على الرغم من انها مش بتاعت احواض خالص الا عندنا تلاقي كل الناس مربينها
وكمان دلوقتي الاهتمام بالشيكلد !! والفرنتوزا – دخول مجموعه اشخاص والاسئله تتوالى منهم عن كل شئ بدايه من الفرق بين جرين تيلر والبلو اكرا الي ان اسماكهم صايمه المهم رجعنا تاني للحوار-

86: كان فيه عضو كريم معانا كتب – اسكندراني- ان الهوايه بتاعتنا في طريقها للانقراض ايه رأي حضرتك ؟بسبب كذا حاجه اولها التجار اما يقولوا لهاوي مثلا انه يربي ارونا عادي مع جولدن مثلا فبتكون خساره للهاوي ماديا ومعنويا ؟
م.ناجي: الهاوي هو الي لازم يقرا ولازم قبل ما يشتري السمكه يتعرف عليها وعلى سلوكها وعلى كل حاجه عنها خصوصا ان الايام دي المعلومات متوفره لكل واحد
كان التاجر تاجر عايز يبيع وخلاص .....

86:وبيقول ان السبب التاني عدم التنوع عند التجار ؟
م.ناجي: ماهوا احنا كان على ايامنا مكنش فيه غير تلات اربع انواع الي هما الجوبي والمولي والزيبرا والفايتر والهوايه استمرت وتتطورت

86: ياترى حضرتك بتابع المنتديات الخاصه بالاسماك ؟
م.ناجي:الصراحه مش اوي بس مره او مرتيين دخلت على البيطره العربيه كان كويس انا حتى سألت قالولي انه من السعوديه ومنتدى ...." للاسف لم ادع له مجال لتكمله خصوصا مع دخول بعض الاشخاص وتوالت الاسئله منهم على الفلتر وكيفيه وضعه حتى انا كنت عايز اقول لهم على اختراعي الي انا عامله في الفلتر عندي بس خفت من الحسد هههه ورجعنا تاني-

86: حضرتك ايه رأيك اصلا في المنتديات وياترى هي بتقدم حاجه للهواه؟
م.ناجي: المنتديات فعلا عامله فرق و فعلا ليها تأثير ملحوظ

86:بمناسبه الانترنت ... امتى حنشوف التطوارت على موقع ناجي انطوان عزيز ؟
م.ناجي: ضحك جدا .. لأ انا اصلا ناسي الموقع حتى بقول للناس بلاش تتدخلوا عليه ....
بس ان شاء الله حيكون فيه موقع كويس قريبا

86: امتى يعني؟
م.ناجي: انا قاعد مع مهندس بيحب وهاوي السمك وبنشوف بس عموما ان شاء الله حيكون في شهر 9 الموقع تمام وشغال

86:" نيجي للجزء الي ممكن يزعل ناس" سمعنا وعرفنا عن وجود مزارع مصريه بدأت تظهر ايه رأي حرتك فيهم؟
م.ناجي: فعلا ظهرت شويه مزارع بس للاسف بطلع كم مش جوده ... ومبتطلعش غير نوعيين بس الفانتيل والكوي
حتى منهم من بوظ شكل الفانتيل خالص بتخليطه مع انواع تانيه حتى الاوان مبقتش هي.!!!!

86: ياترى ممكن المزارع دي تغطي السوق المحلي حتى ؟
م.ناجي: زي ما قلت لك هما مبيهتموش غير بنوعيين بس

86:فيه ناس كانت بتشتكي من عدم توافر بعض الادويه ايه رأي حضرتك ؟
م.ناجي: زي؟؟

86: مثلا " واول دوا افتكرته قلته " سييرا زي سييرا كريستل تقريبا اسمه كدا الي بيشيل العكاره ؟
م.ناجي:موجود حاليا ...انا كنت بلف على التصريح سنه علشان يدخلوهالي وبيعاملونى زي الي بيستورد اغذيه مأكلات او كدا مثلا ودا صعب ...

86: طيب و ادوات قياس واختبار المياه ؟
م.ناجي: موجوده حاليا

86: بس المشكله في الناس الي خارج القاهره مثلا في اسكندريه معندهمش واسكندريه تعتبر قريبه؟
م.ناجي: فعلا مفيش في اسكندريه على الرغم من ان هواه اسكندريه هم الافضل الصراحه – ممكن يكون هواه القاهره اكتر بس الهواه في اسكندريه اكتر حبا للاسماك والهوايه بجد –

86: برضوا تاني في اسكندريه بيشتكوا ان معندهمش تنوع في الاسماك يعني مثلا من فتره كتب احد الاعضاء انه مش لاقي اصناف كتير من الديسكس والسيكلد حتى الانجل مكنش لاقي غير البلاك مفيش ولا مربل انجل مثلا ولا سيلفر انجل
م.ناجي: فعلا للاسف هما بيعانوا لان معندهمش في اسكندريه مستورديين

86:طب وفي القاهره مثلا السيكيلد متوفر مثلا –خصوصا ان الاغلب في النتتدى من محبي ومربي السيكيلد -؟
م.ناجي: موجود ...يعني احنا بنجيب سيكيلد كتيير وانواع كتيير

86: انا للاسف مبحبش السيكيلد خالص الا الانجل بحس اني مربي بلطي –مع الاعتذار لمحبي السيكيلد-؟
م.ناجي:ضحك هو فعلا فيه انواع بتكون شبه زي ما بتقول البلطي بس فيه انواع تانيه جميله جدا

86: احنا عندنا مركز بحوث ياترى لو ساعدت في اسماك الزينه حيكون في فايده –سؤال غريب مش عارف اصلا ازاي سألته-
م.ناجي:اكيد حيكون فايده كبيره جدا وخصوصا في الادويه والتحسيين وانا سمعت ان كليه طب بطري القاهره عملت جزء لاسماك الزينه فلو فعلا عملوا القسم دا حيكون فايده كبيره جدا

86: نرجع للشكاوي فيه ناس بتشكي من السخانات الثرموستات الجديده مش زي القديم يعني الواحد يظبطه مثلا على 25 يجيب 30 او 20 ؟
م.ناجي: ماهو فيه سخان بـ12 وسخان عالي ومركه عاليه وفيه الصيني برضوا فيه عاليه اوي وفيه واحد اي كلام وفيه واحد وسط يعني انا عندي سخانات صيني بتكون وسط ولا هي قمه ولا هيتعبانه في حدود 40 جنيه محدش اشتكى منها خالص وكمان الهاوي لازم يكون اعتماده على الترمومتر لان حتى ممكن يكون في السخان غلطات مهو في سخانات –بعيد عنك اجمعيين- بتفرقع في الاحواض لواحدها ....يعني مش شرط بس تتابعوا السخانات في الفتره الاولى مع الترمومتر

86: كمان شكوى من اختفاء الامازون القصير والناس بتشتكي انه الموجود حاليا في الاسواق مش زيه ولا في قوته ولا تفريعه؟
م.ناجي: لأ موجود انا بجيب الشورت امازون وهو فعلا اقوى من النوع العادي وبيتحمل كويس بس انا بجيبوا

86: والانجل كمان ناس بتشتكي ان فيه انجل كان موجود عسلي العينين او حاجه مده مش متوفر حاليا ؟
م.ناجي: ممكن يكون الي متوفر عندهم دا التفريخ المصري

86:طيب الرساله الي جايه امتى؟
م.ناجي : يوم الجمعه الي جايه لأ الي بعده ان شاء الله

86: طيب ممكن تقولنا على محتويات الرساله الجايه ؟
م.ناجي : مش حاعرف احدد دلوقتي و كمان زي مانت عارف ممكن تتأجل الرساله يوم يوييم كدا بس اكيد اكيد حيكون فيها شيكيلد

وهنا وبعد ان لاحظت مرور ساعتين او اكثر طلبت منه ان يكتب حاجه لاعضاء المنتدى وكانت رساله بسيطه
وهنا قمت واستودعته واستودعت كل الموجديين بدايه من استاذه امل مرورا بأحمد و حتى ميشو ....وانا في طريقي للمنزل رأيت ما كتبه فسعدت بهذه الرساله جدا وارجوا ان اكون وفقت في نقل حوار مفيد واستفدت وافدت اصدقائي هنا من رحلتي تلك وانتظروا رحله وحوار قريب
mou86afa